B – Babilonia
Ene ddire dha nazione
ca ulia ffazza na turre e nu castiedhu,
ca ci riuscia secundu la ntenzione
Domeneddiu s'ia lliare lu cappedhu
Ma siccomu però sta fissazione
ncignau scuncerta a ttutti lu cerviedhu,
spicciau ca tanta fuei la confusione
ca se pigghiara a botte de curtiedhu;
percè quidhu decia: dammi la conza,
e ni ourtànu invece la mmannara;
unu ulìa ggiusta e ll'autru ulìa cu sconza;
Finarmente le cose se scigghiara:
lu frabbecu restau quasi a pprincipiu,
comu le cose de lu Municipiu
(Enrico Bozzi / Conte di Luna –1873-1934– da “Calapinu”, in Ragghi, Stab. Tip. Giurdignano, 1907)
Nessun commento:
Posta un commento